Néi Trends beim Facebook-Messenger

Mat 1,3 Milliarden User ass de Facebook-Messenger de meeschtbenotzen Messenger op der Welt. Ähnlech vill User huet just Whatsapp. Déi App gehéiert mëttlerweil zwar och zu Facebook, léisst sech awer nach ëmmer ouni Facebook-Account benotzen. Nieft chatten kann een mam Messenger och Video-Telefonéieren, Sproochnoriichten, Fotoen, Dateien asw. verschécken. An den USA kann een esouguer mam Messenger bezuelen.

Do gëtt et zanter kuerzem och eng App fir Kanner. Déi dierfen Facebook zwar räicht mat 13 Joer benotzen, fir User vun 6 bis 13 Joer gëtt et awer elo „Messenger Kids“. Verschidden Organisatiounen warnen mëttlerweil virdrun, sou jonk Kanner iwwert eng App chatten ze loossen, well hinnen dat néideg Verständnis dofir feele géif. Allerdéngs huet „Messenger Kids“ fir Elteren vill Virdeeler: Si kënnen bestëmmen, mat wiem kommunizéiert ka ginn an ginn och benoriichtegt, wann hir Kanner Contenu u Facebook mellen. An Europa an domadder zu Lëtzebuerg gëtt et „Messenger Kids“ nach net. Et ass och net bekannt wéini et esouwäit sollt sinn.

Een aneren Trend sinn déi sougenannt „Chatbots“. Mat deenen virtuellen Programm kënnen Firmen oder aner Organisatiounen hire Clienten Informatiounen automatesch matdeelen. Verschidden Fluchgesellschaften hunn ewell Chatbots, iwwert déi sech Informatiounen zu Reessen erfroen oder esouguer Ticketen buchen loossen.

Och am Beräich vum Online-Dating gëtt et Chatbots, zum Beispill „neargroup“. Amplaz vu Fotoen soll een hei mat selwer kreéiertem Contenu zur Léift fannen. Allerdéngs sollt een bei esou Chatbots virsiichteg sinn: Et ass net ëmmer ganz kloer, wat fir eng Donnéeën un déi Firmen, déi d‘Chatbots ubidden, iwwerdroe ginn. Dofir sollt een, iert een esou Funktiounen benotzt, genee recherchéieren, wat dat heescht.

Grondsätzlech sollt een oppassen, wat fir een Messenger een benotzt. De Contenu vum Facebook Messenger ass nämlech net Enn-zu-Enn verschlësselt. Dat heescht, dat aner Leit eventuell matliesen kënnen, wat een esou schreift oder verschéckt. Dofir ass et eng gutt Iddi, fir een verschlësselten Messenger ze benotzen. Een dovunner ass Signal, deem seng Verschlësselung am allgemengen als ganz gutt gëllt.

Weider Informatiounen zu dësem Thema an generell zur Internetsécherheet fannt dir wéi gewinnt op bee-secure.lu

Play
Posted in gDossier | Comments Off on Néi Trends beim Facebook-Messenger

Eng nei Zort vun Malware: Kryptominer

Dir hutt sécher schonn vun Kryptowärungen héieren. Déi bekanntsten ass Bitcoin, déi jo am Dezember vum läschte Joer eng richteg Aachterbunnfahrt vis-à-vis vum Dollar higeluecht huet. Een vun de Grënn, wisou vill Leit op déi virtuell Währung opmierksam gi sinn. Een aneren ass, datt déi meescht Kryptowärungen – et ginn der mëttlerweil eng Hellewull – quasi aus dem Näischt erschaffe kënne ginn. Amplaz vu Banken gëtt et nämlech een dezentralen System, un dem sech all User bedeelegen kënnen.

Hei gëtt dann mat engem kryptographeschen Prozess all Transaktioun validéiert. Dobäi kritt een als Belounung dann och vun Zäit zu Zäit eng Unitéit vun der virtueller Währung, zum Beispill Bitcoin. Dëse Prinzip probéiert dann elo och eng nei Zort vu Malware auszenotzen, nämlech déi sougenannt Kryptominer. Domadder gi Programmer bezeechent, déi d‘Rechenpower vun engem Computer notzen, fir domadder Unitéiten vu Kryptowärung ze generéieren, wat een „minen“ nennt. Allerdéngs kommen déi Suen net dem User vum Computer ze gutt, mä eben deenen Kriminellen, déi d‘Malware verbreeden.

Mat sou Hardware gëtt normalerweis Kryptowährungen “gemined”

Schonn am Summer gouf et Berichter, datt op verschiddenen Websäiten esou Kryptominer agesat géife ginn, déi domadder Reklammen ersetzen wollten. Elo geet dat ganz awer nach e Schratt méi wäit an d‘Software probéiert, sech um Computer vum Affer ze installéieren, fir dann do stänneg Rechenleeschtung ze schmarotzen. Verbreet gëtt Software iwwert Short-Links-Servicer. Dir hutt esou Links sécher scho gesinn: mat Servicer wéi bit.ly oder ad.fly ass et méiglech, aus ganz laangen Adressen vill méi kuerzer ze maachen. Leider bréngt dat och mat sech, datt domadder och relativ einfach Malware verbreet ka ginn.

Weltwäit sollen schonn 15 Milliounen Computeren mat der Malware infizéiert sinn, déi d‘Kryptowährung Monero „mined“. D‘Dateien sollten wuel dacks sou benannt sinn, wéi wann se vu Säite géif kommen, déi illegal Downloads ubitt. Fir sech ze schützen sollt een also engersäits säi Virescanner aktualiséieren an anerersäits gutt oppassen, wat een esou installéiert. Maacht keng .exe-Fichieren op, vun deenen dir net sécher sidd, wouhier ze kommen. D‘Gefor, datt sech Malware dohannert verstoppt, ass grouss.

Fir weider um Courant ze bleiwen, wat Internetsécherheet ugeet, hunn ech och nach een Tipp fir iech: Liked BEE SECURE op Facebook, abonnéiert dëse Podcast an gitt reegelméisseg op bee-secure.lu.

Continue reading

Play
Posted in gDossier | Comments Off on Eng nei Zort vun Malware: Kryptominer

Wat ass een seriéisen Medium?

D‘Fro, wat fir Medien een selwer seriéis fënnt, ass net ëmmer immens einfach ze beäntwerten. Souguer Medien, déi ëffentlech-rechtlech sinn, hunn heiansdo eng „Carte blanche“ fir Leit, déi dës Tribün benotzen, fir allerlee Kabes ze erzielen. Och Facebook stellt sech elo déi Fro. Dëst am Kontext vun den US-Präsidentenwahlen vun 2016.

Dir hutt sécher matkritt, datt Russland virgeworf gëtt, iwwert déi sozial Medien – an do spillt Facebook déi wichtegst Roll – dëse Wahlkampf manipuléiert oder beaflosst ze hunn. Dobäi sollen déi sougenannt „Fake News“ eng grouss Roll gespillt hunn. Gemengt sinn domadder Sitten, déi zwar wéi normal Noriichtesitten ausgesinn, mä an der Reegel just Ligen oder verdréinte Wourechten verbreeden. Dacks gëtt och einfach eng kruzial Informatioun ewechgelooss oder een falschen Kontext uginn.

Facebook wëll elo seng User froen, fir datt si aschätzen, wéi eng Medien seriéis sinn a wat fir eng net. Schonn elo géif dat sozialt Netzwierk seng Notzer heiansdo froen, ob eng bestëmmten Story hinnen gefall hätt. Op dem Mechanismus soll dann och d‘Medien-Bewäerten funktionéieren. Een Problem, deen dobäi awer besteet, ass folgenden: Vill Leit bewäerte Medien net duerno, ob se journalisteschen Kritären standhalen an sech un een Code de Déontologie halen, mä duerno, ob dat wat si liesen hirem Bléck op d‘Welt entsprécht.

Zanter e puer Wochen huet Facebook och um Algorithmus vum Newsfeed geschrauft. D‘User solle méi vun hiren Frënn an hirer Famill gesinn, an manner vun Medien-Siten. Ob sech dat allerdéngs wierklech sou staark auswierkt, bléift ze bezweifelen. Ech hunn op mannst – bis op de Message vu Facebook, datt elo alles aneschters wier – net vill Ännerungen bemierkt.

Wann dir wëllt méi iwwert de Phänomen Fake News gewuer ginn, kënnt dir iech den Dossier vu BEE SECURE dozou duerchliesen. Dir fannt en op eisem Internetsite bei der Kampagne zu Hate Speech. Fir weider um Currant ze bleiwen, wat Internetsécherheet ugeet, hunn ech och nach een Tipp fir iech: Liked BEE SECURE op Facebook, abonnéiert dëse Podcast an gitt reegelméisseg op bee-secure.lu.

Quelle: https://www.zdf.de/nachrichten/heute/facebook-will-nutzer-befragen-zu-falschnachrichten-100.html

Play
Posted in gDossier | Comments Off on Wat ass een seriéisen Medium?

Spectre a Meltdown

Zanter dem Joerswiessel gëtt et grouss Opreeung an der IT-Welt. Dir hutt sécher schonn dovunner héieren, riets ass natierlech vun den Bugs, déi de Numm „Spectre“ an „Meltdown“ kritt hunn. Betraffen sinn bal alleguerten déi modern Computer. De Problem läit nämlech dorunner, wéi modern Prozessoren d‘Informatiounen verarbeschten. Kuerz erënnert: De Prozessor ass d‘Häerzstéck vun all Computer, deen een sech als grouss Rechenmaschinn virstelle kann.

Wat ass dann elo de Problem bei Spectre an Meltdown? Een modernen Prozessor huet een Feature, deen sech speculative execution nennt. Den Prozessor kennt jo den Code vun engem Programm, deen ofleeft. Op verschiddenen Plazen muss hien allerdéngs op Input vum User wäerden. Fir méi séier ze sinn, spekuléiert de Prozessor, wat deen Input kéint sinn an rechent scho mol virun. A ville Fäll bréngt déi Technik méi eng grouss Vitesse fir den User, deen dovunner awer näischt matkritt. Wann den Input een aneren war wéi erwaard, gëtt déi Berechnung einfach verworf.

Leider gëtt et an dem Prozess eben eng Sécherheetslück, déi dozou feiert, datt een Ugräifer kéint déi spekulativ Berechnung ofgräifen. Domadder kéint hien zum Beispill Passwierder offänken, ouni datt jee een déi aginn hätt. Et kéinten och Biller oder aner Donnéeën rekonstruéiert ginn, déi am Fong guer net méi an der Memoire sinn oder op déi den Ugräifer keen Zougrëff sollt hunn.

Wat kann een elo maachen? Am Fong net vill, well esou gutt wéi all modernen Prozessor betraff ass. Allerdéngs hunn déi meescht Software-Hiersteller schonn Patches erausginn, déi op mannst de Meltdown-Bug verhënnere sollen. Dofir ass et wichteg, datt dir är Updates installéiert. An dat op all ären Geräter: dem Computer, dem Laptop, dem Tablet an dem Smartphone. Wann dir déi automatesch Updates aktivéiert, musst dir iech dorëms keng Gedanken maachen.

Dir gesitt, datt sech villes an der Welt vun der Computersécherheet immens séier entwéckelen kann. Dofir ass et wichteg, um Currant ze bleiwen an informéiert ze sinn, fir séier reagéieren ze kënnen. Ech sinn iech also nach eng Kéier mäin Tipp vun der läschter Woch: Liked BEE SECURE op Facebook, abonnéiert dëse Podcast an gitt reegelméisseg op bee-secure.lu an informéiert iech.

Méi Informatiounen: https://spectreattack.com/

Play
Posted in Uncategorized | Comments Off on Spectre a Meltdown

Gutt Virsätz fir dat néit Joer

An, sidd dir gutt an dat néit Joer eragerëtscht? Hoffentlech hat dir e puer flott Feierdeeg an hutt mat deenen gefeiert, déi iech am wichtegsten sinn. Vläicht louch ënnert dem Bam jo och dat een oder aanert elektronescht Gerät. Dat wier e gudde Moment, fir e puer gutt Virsätz mat an dat néit Joer ze huelen. Mä och wann dir kee neien Laptop oder Handy geschenkt krut, kënnt dir iech gutt Virsätz huelen fir 2018 méi sécher am Internet ënnerwee ze sinn.

Den éischten Virsaz ass schwiereg, well en Reegelméissegkeet viraussetzt. Dir wësst sécher schonn, wat ech mengen: Backups! Am beschte wier et, wann dir reegelméisseg, zum Beispill all Woch een Backup op eng extern Festplatt oder an d‘Cloud géift maachen. Wann dir de Backup an d‘Cloud maacht, sollt deen allerdéngs verschlësselt sinn – net, dat aner Leit un är Donnéeën kommen. Et kann een sech awer och d‘Liewe méi einfach maachen an een speziellen Backup-Programm installéieren, deen een drun erënnert, Backups ze maachen. Deen këmmert sech dann och dorëms, datt just déi Fichieren kopéiert ginn, déi sech geännert hunn oder déi nei dobäi komm sinn. Sou dauert den Backup net all Kéiers fuerchtbar laang.

Een zweete gudde Virsaz, deen ech iech géif proposéieren, wier 2018 een Passwuert-Manager ze benotzen. Dëst ass ee Programm, deen all är Passwierder verwalt an se automatesch bei Websäiten agëtt. Dir musst dann net méi bei all Service dat selwecht Passwuert benotzen, well den Passwuert-Manager sech sécher an laang Passwierder fir iech ausdenke kann. Natierlech musst dir dofir als éischt bei all Service d‘Passwuert wiesselen. Mä den Ufank vum Joer ass jo eng gutt Geleeënheet, fir iwwert all seng Accounts nozedenken an vläicht och deen een oder aneren ze läschen.

Den drëtten Virsaz ass een, deen dir hoffentlech alleguerten schonn befollegt: Maacht Updates. Wann dir äre Computer esou astellt, datt en automatesch Updates mécht, kënnt dir roueg schlofen an musst iech keng Gedanken dorëms maachen, op äre Maschinn vunerable ass. Viru kuerzem sinn Informatiounen iwwert den Meltdown- an den Spectre-Bug erauskomm, déi erëm eng Kéier gewisen hunn, wéi wichteg Updates sinn. D‘nächst Woch wäert ech méi genee iwwert deen Bug schwätzen.

Dann hätt ech awer nach een véierten gudde Virsaz fir iech. Deen huet net esou vill mat Astellungen ze dinn, mä méi mat ärer Attitüd. D‘Feld vun der Internetsécherheet gëtt ëmmer méi komplex, dofir ass et wichteg, um Ball ze bleiwen. Dofir: Liked BEE SECURE op Facebook, abonnéiert dëse Podcast an gitt reegelméisseg op bee-secure.lu an informéiert iech.

Play
Posted in gDossier | Comments Off on Gutt Virsätz fir dat néit Joer

Internet of Kadoen

Dir hutt sécherlech scho vum „Internet of Things“ héieren, also den Internet vun de Saachen. Domadder ginn am Fong Geräter benannt, déi sech mam Internet verbanne kënnen. Dat kënne Webcams sinn, Steierunge fir d‘Heizung, den Öffner fir d‘Garage, Spillsaachen oder sougenannt digital Assistente wéi den Alexa vun Amazon oder de Google Assistant.

An der Chrëschtdagszäit léien ëfters emol sou elektronesch Geräter ënnert dem Beemchen. Wien sech iwwerleet, esou Geräter ze verschenken, sollt sech do virdrun awer e puer Gedanke maachen. Zum Beispill, wat fir eng Donnéeën sou Apparater sammelen an un wien se déi viru ginn. Oder ob et iwwerhaapt néideg ass, zum Beispill eng Popp ze verschenken, déi „smart“ ass an sech mam Internet verbanne kann. Dacks gi méi traditionell Geräter ouni déi Funktionalitéit jo och duer. Wann een sech awer fir esou een „smarte“ Kado entscheet, sollt een sech virum Kaf gutt informéieren an am Beschte Fall och Testberichter liesen. Do fënnt een zum Beispill eraus, wat fir Fitnessarmbänner dann elo wierklech den Datenschutzrichtlinie Rechnung droen a wat fir welcher onsécher sinn.

Et gëtt dann awer an dëser Woch och nach een Evenement, wou dir méi gewuer kënnt ginn. Am Kader vu senger Campagne BIG DATA organiséiert BEE SECURE nämlech ee Mol de Mount de Privacy Salon. Dat ass een oppent Evenement, bei dem all déi, déi interesséiert sinn, wëllkomm sinn. Si kënne Virträg vun Experten aus verschiddene Beräicher nolauschteren. Duerno ass da vill Zäit, fir all méiglech froe ronderëm Big Data a Privatsphär ze stellen an sech zu dësen Themen auszetauschen. De nächste privacy salon ass de 6. Dezember, also dëse Mëttwoch. Sou kuerz viru Chrëschtdag wäert et dann och iwwert den Internet of Things a Kadoe goen, de Motto ass nämlech „Internet of Xmas Things“.

Dat ganzt ass wéi gesot de 6. Dezember, an dat am Hackerspace „Level 2“ an der Stad an der Géigend vun der Gare. Den Event geet um Siwen Auer owes lass.

Wien méi iwwert BIG DATA wëll gewuer ginn, kann sech d‘BIG DATA-Kampagne vu BEE SECURE op bee-secure.lu ulauschteren. Do fannt dir awer och eisen Dossier zum Internet of Things mat villen Tipps, wouropper ee beim Kaf vun engem connectéierte Gerät sollt oppassen.

Event: https://www.privacysalon.lu/next-digital-privacy-salon-06-12-17-internet-of-xmas-things/

Play
Posted in gDossier | Comments Off on Internet of Kadoen

Ethesch Problemer bei Algorithmen?

An dësem Podcast gi mir den etheschen Problemer, déi Algorithmen hu kënnen, op de Grond. De ganzen Text gëtt nach nogeliwwert, mir bieden iech Gedold ze hunn. Als Audio-Datei ass den integralen Text verfügbar.

Play
Posted in gDossier | Comments Off on Ethesch Problemer bei Algorithmen?

Iwwerwaachungsdonnéeën aus der Cloud geleaked?

Keen vun eis gëtt gären iwwerwaacht. An dach geschitt et – wahrscheinlech all Dag, bei allem wat mir sou am Internet maachen. Zanter de Revelatioune vum Edward Snowden kenne mir eis am Fong relativ sécher sinn, datt mir zu all Moment kéinte vun engem amerikanesche Geheimdéngscht iwwerwaacht ginn. Mä wat geschitt, wann déi Donnéeën, déi esou een Geheimdéngscht sammelt, un d‘Ëffentlechkeet geroden? Esou ee Fall gouf et elo.

De Sécherheetsfuerscher Chris Vickery vun der Firma „UpGuard“ huet sech d‘Cloud vun Amazon, déi de Numm „S3“ dréit, ugekuckt. Dobäi huet hien natierlech no Sécherheetslücken a „oppenen Dieren“ gesicht an eng fonnt. An net schlecht gestaunt, wéi hien Terabyte un Donnéeë mam Numm „Centcom-Backup“ oder „Pacom-Archive“ fonnt huet. Centcom steet nämlech fir Central Command, also d‘militäresch Leedung vum US-Militär, Pacom fir „Pacific Command“, deen Deel vum US-Militär, deen sech ëm Asien an Australien këmmert. De Vickery huet sech e puer honnert Gigabyte vun deenen Donnéeën erofgelueden an huet erausfonnt, datt et sech tatsächlech ëm Iwwerwaachungsdonnéeën aus sozialen Netzwierker gehandelt huet.

An deenen Donnéeën, déi de Vickery fonnt huet, waren 1,8 Milliarde Beiträg aus deene läschten 9 Joer ze fannen. Sou, wéi déi Donnéeën organiséiert a getagged waren, geet den Expert dovunner aus, datt se zum Schutz géint den Terror genotzt géife ginn, also zum Beispill an deems Leit iwwerwaacht ginn, déi Sympathien zu Terroriste wéi dem sougenannte „Islamesesche Staat“ hunn. Dobäi sollen d‘US-Déngschter net nëmmen hiren eegene Programm „Coral Reef“ benotzt hunn, mä och d‘Open-Source Engine „Elasticsearch“.

 De Vickery war awer net esou erstaunt doriwwer, datt esou vill Donnéeë gesammelt goufen, mä éischter doriwwer, datt se esou schlecht geséchert waren. D‘US-Militär hat jo d‘Cloud vun amazon benotzt. Dobäi gouf awer ee Konfiguratiounsfeeler gemaach, sou datt déi Donnéeën net geséchert oder verschlësselt waren, mä fir déi ganz Welt oppen zougänglech. Sou hätt also jidderee mat e bëssi techneschem Verstand déi Donnéeë fannen a benotze kënnen. Eng wichteg Fro an den USA wier och, ob US-Bierger ebenfalls iwwerwaacht gi si – dat konnt de Vickery awer eendeiteg klären.

Hien huet d‘Militär iwwert de Leak informéiert, a mëttlerweil ass d‘Schwaachstell gefixed. A wat fir eng Lektioun zéie mir aus dem Ganzen? Éischtens sollte mir oppassen, wat mir online stelle – prinzipiell kéint jo alles eng Kéier geleaked ginn. An zweetens sollt ee Saachen, déi een an d‘Cloud stellt, verschlëssele – och wann e net fir den US-Militär schafft. Wéi dat geet – an natierlech weider Informatiounen zum Thema Internetsécherheet fannt dir wéi gewinnt op bee-secure.lu

Play
Posted in gDossier | Comments Off on Iwwerwaachungsdonnéeën aus der Cloud geleaked?

Wat ass een Algoritmus?

Haut kritt dir am BEE SECURE Podcast e klengen Sneak Peek op den nächsten Deel vun der BEE SECURE Kampagne zum Thema BIG DATA.

Bei Big Data geet et jo dorëmmer, datt mir een Bewosstsinn dofir hunn, wien wat fir eng Donnéeën vun eis sammelt a wat domadder kéint geschéien. Een Schlagwuert wat bei dem Thema ëmmer erëm fält, datt den Terme „Algorithmus“. Heiansdo héiert een esouguer Saachen wéi „Algorithmen beherrschen d‘Welt“. Dobäi ass een Algorithmus als alleréischt mol näischt aneres wéi een Rezept, no deem eppes ofleeft. A wann ech Rezept soen, dann ass dat guer net falsch, well all Kachrezept ass am Fong och een Algorithmus. Een Algorithmus seet dem Computer also, wéi hien mat Donnéeën ëmgoen soll. Dobäi ass ëmmer kloer, wat den nächste Schratt ass.

Bei engem klasseschen Algorithmus kënnt beim selwechten Input och ëmmer dat selwecht Resultat eraus. Et ginn mëttlerweil awer och aner Techniken, fir besonnesch mat groussen Bierger vun Donnéeën ëmzegoen. Een dovunner ass zum Beispill d‘Heuristik. Eng Heuristik baséiert dacks op Zoufallsvariablen. Si gëtt benotzt, wann et ze laang géif daueren, fir eng exakt, optimal Léisung ze fannen. Heuristiken ginn zum Beispill dacks benotzt, wann een eng Route sicht. Een anere Begrëff, deen dir sécher schonn dacks héieren hutt, ass d‘kënschtlech Intelligenz. An deem Beräich ass an de leschte Jore vill gefuerscht ginn, an grad zum Beispill beim Erkenne vun Biller sinn vill Fortschrëtter gemaach ginn.

Eng Technik, déi besonnesch Erfolleg hat, nennt sech Deep Learning. Mat Hëllef vun Algorithmen ass een menschlecht Gehier, bzw. d‘Nervenzellen doranner, nogebaut ginn. Sou engem kënschtlecht neurolalt Netz gëtt dann mat Informatiounen gefiddert an „léiert“ dann verschidden Konzepter. Dat funktionéiert dann gutt, wann et schwiereg wier, all eenzelen Fall per Hand ze programméieren. Een Fall ass zum Beispill d‘Handschrëft-Erkennung, wou mat Deep Learning séier Erfolleger geféiert konnte ginn. Aner Gebidder, wou Deep Learning agesat ass, sinn Medezinesch Diagnoseverfahren, Erkennen vu Kreditkaartebedruch, DNA-Analys an esouguer Systemer wéi Autoen, déi sech selwer Steieren.

Dat ganzt huet dann awer och vill Problemer. Deelweis ass et immens einfach, d‘Algorithmen auszetricksen. Dës Läscht ass een Fall bekannt ginn, wou een an engem Bild vun enger Schildkröt just ee Pixel geännert huet – an dunn huet den Algorithmus gemengt, et wier eng Maschinnepistoul. Je nodeem, wat fir eng Grondlag mir dem Computer ginn, fir ze leieren, kann et sinn, datt den Algorithmus duerno och Viruerteeler huet, well dat am Ausgangsmaterial esou war. Den Algorithmus ass dann net neutral, mä genee esou virageholl wéi e Mënsch.

Dat war elo e klengen Iwwerbléck iwwert Thema Algorithmen. Méi dozou fannt dir ganz geschwënn op bee-secure.lu an eisem Dossier BIG DATA.

Play
Posted in gDossier | Comments Off on Wat ass een Algoritmus?

Dramberuff Instagram-Model?

Instagram ass een vun deene beléiftste sozialen Netzwierker, virun allem bei Jugendlechen. An Éisträich sinn et zum Beispill 65 Prozent vun de Jugendlechen, déi Instagram benotzen, méi wéi zum Beispill Facebook. Och zu Lëtzebuerg wäert d‘Situatioun ganz ähnlech ausgesinn. Natierlech vernetzt een sech op der Foto-Plattform net nëmmen ënnereneen, mä abonnéiert och Stars a Blogger. Déi beschäftegen sech dacks mat Theme wéi Fitness, Moud, Lifestyle, Ernärung, asw.

Verschidde vun den Instgram-Stars hu méi Follower wéi sou munch grouss Fernsehsendungen Aschaltquoten. Do ass et kloer, datt Firme probéieren, iwwert déi Profiler un hir jonk Zilgrupp ze kommen. Dat geschitt dacks a Form vu Kooperatiounen: d‘Instagram-Starts kréien een Produit an maachen op hire Fotoe Reklamm dofir. Allerdéngs muss dës Reklamm vum Gesetz hir gekennzeechent sinn, soss ass et nämlech „Schleichwerbung“. An der läscht gouf et zu dem Thema eng Réi Prozesser an Däitschland. D‘Oberlandesgericht Celle huet elo festgestallt, datt et net duer geet, just een Hashtag wéi #ad oder #sponsored ënnert een Post ze stellen. Virun allem dann net, wann deen Hashtag um Schluss vum Beitrag an där üblecher Oplëschtung vun ganz villen Hashtags ënnergeet. Et muss nämlech op den éischte Bléck ze erkenne sinn, datt en Beitrag gesponsert ass.

Dat ass op mannst d‘Situatioun an Däitschland. Mä wéi gesäit et zu Lëtzebuerg aus? Déi Fro léisst sech just schwéier beäntwerten. Et gëtt zwar een Gesetz, dat Schleichwerbung verbitt, mä dat bezitt sech just op Fernsehsendungen. Wien sech zu Lëtzebuerg dozou entscheet, sougenannt „gesponsert Beiträg“ op Instagram ze publizéieren, sollt sech op alle Fall virdru gutt informéieren a berode loossen. Sou Beiträg sollten däitlech als Reklamm kennzeechent ginn, fir kee Risiko anzegoen.

Mä vläicht sollte mir souwisou driwwer nodenken, wat den Dram „Instagram-Model“ eigentlech heescht. Eleng vun engem Instagram-Account an de Revenuë vu Reklammen ze liewen, wäert fir déi allermeescht ëmmer een Dram bleiwen – op et am klenge Lëtzebuerg iwwerhaapt méiglech ass, ass ze bezweifelen. An och wann een op Instagram den Androck kritt, sou „Stars“ hätten een einfacht, flott Liewen, ass dat net déi ganz Wourecht: Ee Model-Job ass een haarde Beruff, deen och dacks heescht, datt een grouss Stécker vu senger Privatsphär opgi muss.

Generell sollt en sech als User op Instagram ëmmer e puer Froe stellen. Zum Beispill, wisou Firmen op Instagram probéieren, méiglechst verstoppt Reklamm ze maachen an wien se domadder erreeche wëllen. Och d‘Fro, wat hannert den perfekt inzeenéierten Fotoe stécht, sollt sech gestallt ginn. Een weidere wichtegen Aspekt ass déi eege Privatsphär: Wat fir Fotoe stellen ech online an wien kann domadder wat fir Réckschlëss op mäi Privatliewen zéien?

Weider Informatiounen zum Thema an Links zu engem Privatsphär-Leitfaden fir Instagram fannt dir op bee-secure.lu

Play
Posted in gDossier | Comments Off on Dramberuff Instagram-Model?